لويس فون ان .. الشاب اللطيف مخترع الكابتشا ..

لويس فون ان .. الشاب اللطيف مخترع الكابتشا .. اللى انت بتشوفه فى كل منتدى , او سايت  بتسجل فيه ..بيطلب منك تدخل مجموعة من الحروف  المبهمة بأيدك  اثناء عملية التسجيل  عشان يتأكد ان فى بنى ادم فعلا مش روبوت بيسجل حسابات وهمية  قاعد ورا الشاشة .. 
فى يوم الأخ لويس بعد ما اخترع الكابتشا جاله نوع من انواع تأنيب الضمير , هو صحيح العملية مش بتستغرق اكتر من عشر ثوانى من اى مستخدم عادى ..عشان يكتب مجموعة الحروف دى ... بس لويس ما بصلهاش كده... لويس بصلها ان فيه ملايين المستخدمين للأنترنت  كل يوم بيستخدمو الكابتشا و بيضيعو من وقتهم عشر ثوانى .. يعنى الاف الساعات والطاقة المبذولة  من بشر كتير على مستوى العالم بيضيعو يوميا بسبب الكابتشا دى !! ...
طب  ليه ما يطورش النظام ده ؟؟..ليه مايتمش استخدام الكابتشا دى فى حاجة مفيدة للبشرية ؟؟... حاجة ذات قيمة وفايدة  يشارك فيها ملايين البشر على مستوى العالم بدون مايحسو ؟؟..
ومن هنا جت الفكرة العبقرية بالتعاون مع جوجل , جوجل  كانت عاملة مشروع من فترة لحفظ التراث العالمى من الكتب والمخطوطات .. بيتم رفع الكتب  القديمة سكان بى دى اف .. و بأستخدام تقنية ال  ocr   بيتم تحويل الكتب دى لكتب الكترونية ..
نظام ال  ocr   بأختصار وده انا بستخدمه بشكل شبه يومى فى شغلى بأستخدام برنامج  adobe acrobat   النسخة اللى بفلوس  .. بيخليك بعد ما تاخد  اى ورقة مكتوب فيها اى كلام وترفعها سكان  عالكومبيوتر .. تخلي الكلام اللى فيها   selectable   تقدر تاخده كوبى وباست وتعدل فيه كأنه ورقة مكتوبة على برنامج وورد مش مجرد ورقة مسحوبة سكان وصورة .. يعنى بأختصار بيخلى الكومبيوتر يتعرف عالكلام المكتوب فى الورقة دى وده اعجاز فى حد ذاته .. !!
لكن تقنية ال   ocr  فيها عيب  سخيف وبيضايقنى احيانا .. لو الورقة اللى انت بترفعها سكان دى فيها مشاكل .. يعنى مخطوطة من كتاب قديم جدا مثلا  الورق اصفر والحروف بتاعته باهتة وممسوحة ومش واضحة .. الكومبيوتر مش بيقدر يتعرف على بعض الكلمات المكتوبة والموضوع بيتطلب  تدخل بشرى للتعرف على الكلمات المبهمة دى , وعشان تدقق ملايين الكلمات فى ملايين الكتب  وتتعرف عليها بأستخدام بشر موضوع مرهق جدا طبعا مهما كان حجم مجموعة العمل  اللى هتشتغل عليه ..
لويس فكر .. طب ليه مايتمش استخدام تقنية الكابتشا دى فى جعل ملايين البشر على مستوى العالم يساعدو فى  التعرف على الكلمات المبهمة فى الكتب دى ؟؟.. يعنى بمعنى اصح .. كل مرة حضرتك بتدخل فيها بعض الحروف عشان تسجل فى منتدى انت مش بس بتثبت انك مش روبوت  ... انت  كمان بتساعد الناس اللى قاعدة فى جوجل  بترفع الكتب دى انها تتعرف على كلمة مبهمة فى كتاب ما بيترفع عالنت ..وبكده عمليات رفع الكتب على الأنترنت بقت اسرع بكتير من الأول .. !!
من هنا بقى لويس بقى مهووس  بفكرة الحشد الجماعى .. ازاى تستخدم  ملايين البشر على مستوى العالم  فى اشياء مفيدة جدا للبشرية  بدون ما يحسو ..  بعدها بفترة الراجل كان قاعد مع واحد زميله وخطر على باله فكرة   هو احنا لو حبينا نترجم موقع الويكبيديا   الأنجليزى مثلا من الأنجليزية للغة  تانية زى الأسبانية.. محتاجين وقت ومجهود وفلوس قد ايه ؟؟....حسبها لقى انه عشان يترجم الويكبيديا للأسبانى بأستخدام مترجمين محترفين محتاج خمسين مليون دولار تقريبا  !!!.. طبعا فى ترجمة  الكترونية  دلوقتى بيوفرها جوجل  لكن اوقات كتير مابتبقاش دقيقة او احترافية وبتطلع كلام غبى مالوش معنى ..
ومن هنا جتله فكرة انشاء مشروعه التانى ..  ديولينجو .. ديولينجو للى ما يعرفوش عبارة عن موقع وابليكيشن مجانى لتعليم اللغات , فيه لغات كتير متاحة حاليا ..بيعلمك اللغة عن طريق لعبة بتلعبها بالتدريج بيبتدى معاك بكلمات وجمل بسيطة ويتطور بيك بالتدريج لجمل اكثر تعقيدا .. لحد مايوصل معاك لمستوى كويس .. بعد كده كنوع من التدريب الأضافى  ليك بعد اتقانك اللغة اللى انت عايز تتعلمها  بشكل كبير تقدر تساهم مع ملايين البشر ..فى ترجمة بعض الفقرات عالموقع للغتك الأصلية  كنوع من التدريب ليك .. الفقرات دى متاخدة من مقالات او مواقع عالأنترنت محتاجة ترجمة  للغات تانية  ..وبكده  الموقع  يبقى منه ساهم فى تعليم ملايين البشر على مستوى العالم لغات اجنبية تنفعهم فى حياتهم العملية وفى نفس الوقت  تبقى ساعدت فى ترجمة محتوى كبير على الأنترنت للغات اخرى بشكل مجانى .. ديولينجو حاليا بيستخدمه اكتر من 100 مليون بنى ادم على مستوى العالم بيتعلمو لغات اجنبية وفى نفس الوقت بيساهمو فى ترجمة مقالات وكتب من على الأنترنت  للغات اخرى ...